Published:27.01.2021Category:Srilanka

நாட்டில் கொரோனா மரணங்களின் எண்ணிக்கை மேலும் உயர்வு

இலங்கையில் கொவிட்-19 தொற்று தொடர்பான மேலும் 2 மரணங்கள் பதிவாகியுள்ளதாக, சுகாதார சேவைகள் பணிப்பாளர் நாயகம் அசேல குணவர்தன தற்போது (27) அறிவித்துள்ளார்.

இலங்கையில் ஏற்கனவே 288 கொரோனா மரணங்கள் பதிவான நிலையில், தற்போது அறிவிக்கப்பட்டுள்ள 2 மரணங்களுடன், இலங்கையில் இதுவரை 290 கொரோனா மரணங்கள் பதிவாகியுள்ளமை குறிப்பிடத்தக்கது.

இவ்வாறு அறிவிக்கப்பட்டவர்கள் ஒருவர் இன்றும் (27) ஒருவர் நேற்றையதினமும் (26) மரணமடைந்துள்ளதாக அறிவிக்கப்பட்டுள்ளது.

289ஆவது மரணம்
கொழும்பு 15 (மட்டக்குளி/ மோதறை) பிரதேசத்தைச் சேர்ந்த, 43 வயதான ஆண் ஒருவர், கொவிட்-19 தொற்றாளராக அடையாளம் காணப்பட்டதைத் தொடர்ந்து, ஹோமாகம ஆதார வைத்தியசாலையில் சிகிச்சை பெற்று வந்த நிலையில் மரணமடைந்துள்ளார். அவரது மரணம் இன்று (27) நிகழ்ந்துள்ளது. அவரது மரணத்திற்கான காரணம், கொவிட்-19 நியூமோனியா மற்றும் சிக்கலான இருதய நோய், என அறிவிக்கப்பட்டுள்ளது.

290ஆவது மரணம்

கோனபொல பிரதேசத்தைச் சேர்ந்த 74 வயதான ஆண் ஒருவர், ஹொரணை ஆதார வைத்தியசாலையில் அனுமதிக்கப்பட்ட நிலையில் மரணமடைந்துள்ளார். அவரது மரணம் நேற்று (26) நிகழ்ந்துள்ளது. அவரது மரணத்திற்கான காரணம், கொவிட்-19 நியூமோனியா, சிறுநீரக தொற்று மற்றும் உக்கிர செல்லுலிடிஸ் (Cellulitis) நோய் நிலை, என அறிவிக்கப்பட்டுள்ளது.