உலகளவில் பல்வேறு நாடுகளில் கொரோனா தடுப்பூசி போடும் பணிகள் தீவிரமடைந்துள்ளன. பல நாடுகளில் பரவலாக ஃபைசர் தடுப்பூசி போடப்பட்டு வருகிறது. இதுபோக, மாடர்னா, அஸ்ட்ராஜெனகா ஆகிய நிறுவனங்களின் தடுப்பூசிகளும் பயன்படுத்தப்படுகின்றன.

இந்நிலையில், அஸ்ட்ராஜெனகா தடுப்பூசியை பயன்படுத்துமாறு உலக சுகாதார அமைப்புக்கு ஆலோசனை வழங்கும் நிபுணர்கள் பரிந்துரைத்துள்ளனர். கொரோனாவின் உருமாறிய புதிய வைரஸ்களால் அவதிப்படும் நாடுகளும் அஸ்ட்ராஜெனகா தடுப்பூசியை பயன்படுத்தலாம் என அவர்கள் அறிவுறுத்தியுள்ளனர்.

தென்னாப்பிரிக்காவில் பரவத் தொடங்கியுள்ள புதிய கொரோனா வைரஸை தடுப்பூசிகளால் எதிர்கொள்ள முடியுமா என பல தரப்புகளில் சந்தேகங்கள் எழுந்துள்ளன. இந்த சூழலில், அஸ்ட்ராஜெனகா தடுப்பூசியை அனைத்து கொரோனா வைரஸ்களுக்கும் பயன்படுத்தலாம் என உலக சுகாதார அமைப்பின் ஆலோசனை நிபுணர்கள் தெரிவித்துள்ளனர்.

இந்த நிலையில், அஸ்ட்ராஜெனெகாவின் கோவிட் -19 தடுப்பூசியை பயன்படுத்த கனடா வெள்ளிக்கிழமை ஒப்புதல் அளித்துள்ளது. Health Canada கடந்த டிசம்பர் மாதம் ஃபைசர்-பயோஎன்டெக் மற்றும் மாடர்னா உருவாக்கிய 2 கொரோனா தடுப்பூசிகளை அங்கீகரித்தது.

ஆனால், நவம்பரில் வெளியிடப்பட்ட சோதனை தரவுகளின் அடிப்படையில் அஸ்ட்ராஜெனெகாவின் தடுப்பூசிக்கு ஒப்புதல் அளிப்பதில் Health Canada தாமதம் காட்டியது. இந்நிலையில் தற்போது, நாட்டின் அனைத்து பெரியவர்களுக்கும் அஸ்ட்ராஜெனெகா தடுப்பூசி பாதுகாப்பானது என ஆய்வின் முடியில் அறியப்பட்டப்பின், ஆக்ஸ்போர்டு பல்கலைக்கழகம் மற்றும் அஸ்ட்ராஜெனெகா இணைந்து உருவாக்கிய கோவிட்-19 தடுப்பூசியை நாட்டின் 3-வது அவசரகால தடுப்பூசியாக பயன்படுத்த்த அங்கீகாரம் அளித்துள்ளது.

இதன் மூலம், நாட்டில் தடுப்பூசி திட்டத்தின் வேகத்தை அதிகப்படுத்த கனடா முடிவெடுத்துள்ளது. மேலும், அஸ்ட்ராஜெனெகா தடுப்பூசி கொரோனாவுக்கு எதிராக 62.1 சதவீதம் செயல்திறன் கொண்டதாகவும், மொத்தத்தில் அதை பயன்படுத்துவதன் முலம் முக்கியமான பாதுகாப்பு கவலைகள் எதுவும் இல்லை என்றும் தெரிவித்துள்ளது. இந்நிலையில், அஸ்ட்ராஜெனெகாவிடமிருந்து 20 மில்லியன் டோஸ் தடுப்பூசியை கனடா ஆர்டர் செய்துள்ளது.