மத்திய பிரதேசத்தின் போபால் நகரில் யூனியன் கார்பைடு தொழிற்சாலை அமைந்துள்ளது. இதில், 40 ஆண்டுகளுக்கு முன் விஷ வாயு கசிவு ஏற்பட்டது. 1984-ம் ஆண்டு டிசம்பர் 2 மற்றும் 3 ஆகிய நாட்களுக்கு இடைப்பட்ட இரவில் மெத்தில் ஐசோ சயனேட் என்ற வாயு கசிந்ததில் 5,479 பேர் வரை உயிரிழந்தனர்.
ஆயிரக்கணக்கானோர் தீவிர மற்றும் நீண்டகால சுகாதார பாதிப்புகளுக்கு ஆளானார்கள். இந்த சூழலில், கடந்த டிசம்பர் 3-ந்தேதி மத்திய பிரதேச ஐகோர்ட்டு வெளியிட்ட செய்தியில், சுப்ரீம் கோர்ட்டு உத்தரவுக்கு பின்னரும் போபாலில் யூனியன் கார்பைடு ஆலை ஏன் இன்னும் சுத்தம் செய்யப்படாமல் உள்ளது? என அதிகாரிகளை கடிந்து கொண்டது.
சம்பவம் நடந்து 40 ஆண்டுகள் ஆன பின்னரும், அதிகாரிகள் மந்த நிலையிலேயே உள்ளனர் என கூறியதுடன், கழிவுகளை வேறிடத்திற்கு கொண்டு செல்ல 4 வார கால அவகாசம் அளித்துள்ளது.
இந்த நிலையில், போபாலில் உள்ள ஆலையில் இருந்து தார் மாவட்டத்தில் உள்ள பீதாம்பூர் தொழிற்பேட்டை பகுதிக்கு ஆலை கழிவுகளை கொண்டு செல்வது என முடிவானது. இதற்காக, கடந்த ஞாயிற்று கிழமையில் இருந்து ஏறக்குறைய 100 பேர் பணியில் ஈடுபட்டனர்.
இந்த கழிவுகளை ஏற்றிய வாகனங்கள் 7 மணிநேர பயணத்திற்கு பின்னர், ஆலையில் இருந்து 250 கி.மீ. தொலைவிலுள்ள பீதாம்பூர் தொழிற்பேட்டையை சென்றடைந்தன. இதில் ஈடுபட்ட தொழிலாளர்களுக்கு 30 நிமிடங்களுக்கு ஒரு முறை ஓய்வு கொடுக்கப்பட்டது. அவர்களுக்கு அவ்வப்போது சுகாதார பரிசோதனைகளும் மேற்கொள்ளப்பட்டன.
