ஸ்பெயினை மிரள வைத்த கோல் கீப்பர்

Previous Next

Font size:

உலகக் கோப்பை கால்பந்து தொடரில் ரசிகர்களை ஆச்சரியப்படுத்திய போட்டியாக ஸ்பெயின் மற்றும் கேப் வெர்டே அணிகளுக்கு இடையிலான மோதல் அமைந்தது.

அட்லாண்டாவில் நடைபெற்ற ‘எச்’ பிரிவு லீக் ஆட்டத்தில் முன்னாள் சாம்பியனான ஸ்பெயின் அணியை, அறிமுக அணியான கேப் வெர்டே கோல் இன்றி தடுத்து அனைவரின் கவனத்தையும் ஈர்த்துள்ளது.

போட்டி முழுவதும் பந்தை அதிக நேரம் கட்டுப்பாட்டில் வைத்திருந்த ஸ்பெயின் அணி தொடர்ந்து தாக்குதல் ஆட்டத்தை வெளிப்படுத்தியது. பெட்ரி உள்ளிட்ட வீரர்கள் பல முறை கோல் அடிக்க முயன்றாலும், கேப் வெர்டே அணியின் அனுபவம் மிக்க கோல் கீப்பர் வோசின்யா அபாரமாக தடுத்தார்.

போட்டியின் 71-வது நிமிடத்தில் இளம் நட்சத்திரம் லமின் யமால் களமிறக்கப்பட்ட போதிலும், ஸ்பெயின் அணியால் கோல் அடிக்க முடியவில்லை.

40 வயதான வோசின்யா, போட்டி முழுவதும் 7 முக்கிய கோல் வாய்ப்புகளை தடுத்து ரசிகர்களின் பாராட்டைப் பெற்றார்.

இறுதியில், போட்டி 0-0 என்ற கோல் கணக்கில் சமநிலையில் முடிந்தது. இந்த உலகக் கோப்பை தொடரில் கோல் எதுவும் பதிவாகாத முதல் போட்டி என்ற சாதனையையும் இந்த ஆட்டம் பெற்றுள்ளது.

சுமார் 5 லட்சம் மக்கள் தொகை கொண்ட சிறிய தீவு நாடான கேப் வெர்டே, தனது முதல் உலகக் கோப்பை போட்டியிலேயே பலம் வாய்ந்த ஸ்பெயின் அணியை தடுத்து ஒரு புள்ளியை கைப்பற்றியது, அந்த நாட்டிற்கு வரலாற்றுச் சாதனையாகக் கருதப்படுகிறது.

கேப் வெர்டேவின் இந்த போராட்ட மனப்பான்மையும், வோசின்யாவின் அபார ஆட்டமும் கால்பந்து ரசிகர்களிடையே பெரும் வரவேற்பைப் பெற்றுள்ளது.