ஈரானுக்கு ரூ.3 ஆயிரம் கோடியா; மறுத்த டிரம்ப்

Previous Next

Font size:

அமெரிக்கா மற்றும் ஈரான் இடையிலான போர் நிறுத்த புரிந்துணர்வு ஒப்பந்தத்தின் ஒரு பகுதியாக, ஈரானுக்கு அமெரிக்கா ரூ.3 ஆயிரம் கோடி வழங்க உள்ளதாக வெளியான தகவல்களுக்கு அமெரிக்க அதிபர் டொனால்ட் டிரம்ப் மறுப்பு தெரிவித்துள்ளார்.

உலகளாவிய கவனத்தை ஈர்த்த அமெரிக்கா - ஈரான் மோதல் பல நாட்கள் நீடித்த நிலையில், தற்போது இரு நாடுகளும் அமைதி ஒப்பந்தத்தை நோக்கி நகர்ந்து வருகின்றன.

வரும் 19ஆம் தேதி அமைதி ஒப்பந்தம் கையெழுத்தாகவுள்ளதாகவும், அதனைத் தொடர்ந்து விரிவான ஒப்பந்தத்தை உருவாக்கும் நோக்கில் அடுத்த 60 நாட்களுக்கு பேச்சுவார்த்தைகள் தொடரவுள்ளதாகவும் தகவல்கள் வெளியாகியுள்ளன.

இரு தரப்புகளுக்கும் இடையே உருவாக்கப்பட்டுள்ள 14 அம்சங்களைக் கொண்ட புரிந்துணர்வு ஒப்பந்தத்தில், லெபனான் தொடர்பான இராணுவ நடவடிக்கைகளை கைவிடுவது, ஈரான் துறைமுகங்கள் மீதான அமெரிக்க கடற்படை முற்றுகையை திரும்பப் பெறுவது மற்றும் ஹார்முஸ் ஜலசந்தியை மீண்டும் திறப்பது உள்ளிட்ட அம்சங்கள் இடம்பெற்றுள்ளதாக கூறப்படுகிறது.

இந்த நிலையில், ஈரானின் மறுசீரமைப்பு திட்டங்களுக்காக அமெரிக்கா ரூ.3 ஆயிரம் கோடி வழங்கும் என்ற தகவல் சமூக வலைதளங்களிலும், சர்வதேச ஊடகங்களிலும் பரவலாக பேசப்பட்டது.

ஆனால் இதற்கு பதிலளித்துள்ள அமெரிக்க அதிபர் டிரம்ப், “ஈரான் ஒருபோதும் அணு ஆயுதத்தை வைத்திருக்காது என்று ஒப்புக்கொண்டுள்ளது. அமெரிக்கா ஈரானுக்கு ரூ.3 ஆயிரம் கோடி வழங்குகிறது என்பது முற்றிலும் பொய்யான தகவல்” என்று தெரிவித்துள்ளார்.

மேலும், இந்த தகவல் அரசியல் நோக்கத்துடன் பரப்பப்பட்ட வதந்தி என்றும் அவர் குற்றம்சாட்டியுள்ளார்.

டிரம்பின் இந்த விளக்கம், அமெரிக்கா - ஈரான் அமைதி ஒப்பந்தம் தொடர்பான சர்வதேச விவாதங்களுக்கு மேலும் முக்கியத்துவம் சேர்த்துள்ளது.