ஸ்காபரோவில் ஸ்கூட்டர் பேட்டரி வெடித்து பயங்கரத் தீ!

Previous Next

Font size:

ஸ்காபரோ பகுதியில் உள்ள உயர்மட்ட அடுக்குமாடி குடியிருப்பு ஒன்றில், மின்சார ஸ்கூட்டரின் லித்தியம்-அயன் பேட்டரி வெடித்து ஏற்பட்ட பயங்கரத் தீ விபத்தில் 3 பேர் காயமடைந்து மருத்துவமனையில் அனுமதிக்கப்பட்டுள்ளனர்.

ஸ்காபரோவில் உள்ள மார்க்ஹாம் ரோடு மற்றும் எல்ஸ்மியர் ரோடு சந்திப்புக்கு அருகிலுள்ள ஒரு குடியிருப்பு கட்டிடத்தில் ஜூலை 12 இரவு இந்தச் சம்பவம் நடந்துள்ளது. குடியிருப்பின் ஒரு வீட்டிற்குள் சார்ஜ் போடப்பட்டிருந்த ஈ-ஸ்கூட்டரின் பேட்டரி திடீரென வெடித்துப் பயங்கரத் தீப்பற்றியது. இதனால் அப்பகுதி முழுவதும் அடர்ந்த கரும்புகை சூழ்ந்தது.

தீ விபத்தில் சிக்கிய 3 பேருக்குப் புகை மூட்டத்தால் கடுமையான மூச்சுத்திணறல் மற்றும் தீக்காயங்கள் ஏற்பட்டன. அவர்கள் உடனடியாக டொராண்டோ அவசர மருத்துவக் குழுவினரால் அருகில் உள்ள மருத்துவமனைக்குக் கொண்டு செல்லப்பட்டனர்.

டொராண்டோ தீயணைப்புப் படையினர் சம்பவ இடத்திற்கு விரைந்து வந்து, தீ மற்ற வீடுகளுக்குப் பரவாமல் விரைவாகக் கட்டுப்படுத்தினர். பாதுகாப்பு கருதி அந்தத் தளத்தில் இருந்த மற்ற குடியிருப்பாளர்களும் தற்காலிகமாக வெளியேற்றப்பட்டனர்.

வீடுகளுக்குள் மின்சாரச் சாதனங்கள் மற்றும் ஈ-ஸ்கூட்டர்களை சார்ஜ் செய்யும்போது அங்கீகரிக்கப்பட்ட சார்ஜர்களை மட்டுமே பயன்படுத்த வேண்டும். இரவு நேரங்களில் கண்காணிக்காமல் சார்ஜ் போடுவதைத் தவிர்க்க வேண்டும், என டொராண்டோ தீயணைப்புத் துறை மீண்டும் எச்சரித்துள்ளது.