ஹோர்முஸ்; நாங்களே முடிவு செய்வோம்!” – ஈரான்

Previous Next

Font size:

ஹோர்முஸ் நீரிணையை எப்போது திறப்பது, எப்போது மூடுவது என்பது தொடர்பாக ஈரானே முடிவு செய்யும் என ஈரானின் துணை வெளியுறவு அமைச்சர் காசிம் கரீபாபாடி தெரிவித்துள்ளார்.

அமெரிக்க ஜனாதிபதி டொனால்ட் ட்ரம்ப், ஈரான் தோற்கடிக்கப்பட்ட பின்னர் ஹோர்முஸ் நீரிணையை அமெரிக்கப் பகுதியாக அறிவிக்கலாம் என சமீபத்தில் தெரிவித்திருந்தார்.

இந்த கருத்துக்கு பதிலளித்த காசிம் கரீபாபாடி, ஹோர்முஸ் நீரிணையை ஒரு சமூக வலைதளப் பதிவு மூலமாகவோ, விமானந்தாங்கிக் கப்பல் மூலமாகவோ அல்லது உத்தரவு பிறப்பிப்பதன் மூலமாகவோ கைப்பற்ற முடியாது என கடுமையாக தெரிவித்துள்ளார்.

மேலும், ஹோர்முஸ் நீரிணை தொடர்பான அணுகல் மற்றும் தடுப்பு நடவடிக்கைகள் ஈரானின் கட்டுப்பாட்டில் தொடரும் என்றும் அவர் வலியுறுத்தியுள்ளார்.

அமெரிக்கா தனது தோல்வியை ஏற்றுக்கொள்ளும் வரை ஹோர்முஸ் நீரிணை மீதான ஈரானின் தடுப்பு நடவடிக்கைகள் தொடரும் என்றும் அவர் குறிப்பிட்டுள்ளார்.

இதற்கு முன்னதாகவே, ஹோர்முஸ் நீரிணை மீது அமெரிக்கா “முழுமையான கட்டுப்பாட்டை” பெற்றுள்ளதாக ட்ரம்ப் கூறியிருந்தார். அமெரிக்க கடற்படையின் முற்றுகையை அவர் “இரும்புச் சுவர்” என்றும் வர்ணித்திருந்தார்.

ஹோர்முஸ் நீரிணை உலகின் முக்கியமான எண்ணெய் மற்றும் எரிசக்தி போக்குவரத்து வழித்தடங்களில் ஒன்றாக இருப்பதால், இரு தரப்பினரின் இந்த மோதல் சர்வதேச கப்பல் போக்குவரத்துக்கும் எண்ணெய் சந்தைக்கும் தொடர்ந்து அழுத்தத்தை ஏற்படுத்தி வருகிறது.

இதனால், அமெரிக்கா–ஈரான் மோதலில் ஹோர்முஸ் நீரிணையின் கட்டுப்பாடு தற்போது மிக முக்கியமான இராணுவ மற்றும் இராஜதந்திர விவகாரமாக மாறியுள்ளது.