பிரான்ஸ் தூதர்கள் மீது ஈரான் குற்றச்சாட்டு!

Previous Next

Font size:

வெளிநாட்டுத் தலையீடு தொடர்பான தேசிய பாதுகாப்பு விசாரணையின் போது, இரண்டு பிரான்ஸ் தூதரக அதிகாரிகள் ஈரானிய பாதுகாப்புப் பிரிவினரால் தடுத்து வைக்கப்பட்டதாக ஈரான் தெரிவித்துள்ளது.

ஈரானிய உளவுத்துறை அமைச்சகத்தின் தகவலின்படி, வெளிநாட்டு செல்வாக்கு மற்றும் தலையீடு தொடர்பான வழக்கில் சந்தேகநபர்களை கைது செய்வதற்கான நீதிமன்ற உத்தரவை அதிகாரிகள் செயல்படுத்திக் கொண்டிருந்தபோது, ரகசிய சந்திப்பு இடம்பெற்றதாகக் கூறப்படும் இடத்தில் இந்த இரு பிரான்ஸ் தூதர்களும் இருந்துள்ளனர்.

இதையடுத்து, இருவரும் குறுகிய நேரம் தடுத்து வைக்கப்பட்டு விசாரணைக்கு உட்படுத்தப்பட்டதாக தெரிவிக்கப்பட்டுள்ளது.

பின்னர், அவர்கள் பிரான்ஸ் தூதரிடம் ஒப்படைக்கப்பட்டதாக ஈரான் தெரிவித்துள்ளது.

சம்பவ இடத்தில் கைப்பற்றப்பட்டதாகக் கூறப்படும் ஆவணங்கள் மற்றும் பொருட்களை ஆரம்பகட்டமாக ஆய்வு செய்ததில், ஈரானில் செல்வாக்கை உருவாக்கவும், வெளிநாட்டுத் தலையீட்டிற்கான சூழலை ஏற்படுத்தவும் திட்டமிட்டதாகக் கூறப்படும் நடவடிக்கைகளுக்கான தடயங்கள் கிடைத்துள்ளதாக ஈரானிய உளவுத்துறை அமைச்சகம் தெரிவித்துள்ளது.

மேலும், கைப்பற்றப்பட்ட சில ஆவணங்களில் ஈரானுக்கான முன்னாள் பிரான்ஸ் தூதரின் கையொப்பம் இருந்ததாகவும் ஈரான் தரப்பு கூறியுள்ளது.

இராஜதந்திர அந்தஸ்து கொண்ட நபர்கள் சட்டவிரோதமான அல்லது தலையீட்டு நடவடிக்கைகளில் ஈடுபடுவதை அனுமதிக்க முடியாது என ஈரான் எச்சரித்துள்ளது.

இதேவேளை, கடந்த ஜூலை மாதம் இடம்பெற்ற இதே விவகாரத்துடன் தொடர்புடைய மற்றொரு சம்பவத்தில் இரண்டு பிரான்ஸ் தூதரக ஊழியர்கள் பல மணி நேரம் ஈரானிய பாதுகாப்புப் பிரிவினரால் தடுத்து வைக்கப்பட்டதாகவும், அவர்களில் ஒருவரை தாக்கியதாக பிரான்ஸ் குற்றம்சாட்டியிருந்தது. ஈரான் இந்தக் குற்றச்சாட்டை மறுத்திருந்தது.

இதனால், ஈரான் மற்றும் பிரான்ஸ் இடையிலான இராஜதந்திர உறவில் புதிய பதற்றம் ஏற்பட்டுள்ளதுடன், வெளிநாட்டு தலையீடு தொடர்பான ஈரானின் குற்றச்சாட்டுகள் சர்வதேச கவனத்தை ஈர்த்துள்ளன.