ஈஸ்டர் தாக்குதல் – 15 பேர் குற்றவாளிகள், 9 பேர் விடுதலை!

Previous Next

Font size:

2019ஆம் ஆண்டு இடம்பெற்ற உயிர்த்த ஞாயிறு பயங்கரவாதத் தாக்குதல்கள் தொடர்பில் நௌஃபர் மௌலவி உள்ளிட்ட 24 பேருக்கு எதிராகத் தொடரப்பட்ட வழக்கில், கொழும்பு மேல் நீதிமன்றத்தின் மூவரடங்கிய சிறப்பு நீதிபதிகள் அமர்வு இன்று தீர்ப்பை வழங்கியுள்ளது.

நீண்டகாலமாக எதிர்பார்க்கப்பட்ட இந்தத் தீர்ப்பில், குற்றம் சாட்டப்பட்ட 24 பிரதிவாதிகளில் 15 பேர் குற்றவாளிகள் எனக் கண்டறியப்பட்டுள்ளனர்.

அதேவேளை, ஏனைய 9 பிரதிவாதிகளும் குற்றமற்றவர்கள் என விடுவிக்கப்பட்டுள்ளதாக தெரிவிக்கப்பட்டுள்ளது.

நௌஃபர் மௌலவி உள்ளிட்ட 24 பேருக்கு எதிராக, சதித்திட்டம் தீட்டுதல், தாக்குதல்களுக்கு உதவுதல் மற்றும் உடந்தையாக செயற்பட்டமை உள்ளிட்ட குற்றச்சாட்டுகளின் கீழ் மொத்தம் 23,270 குற்றச்சாட்டுகள் தாக்கல் செய்யப்பட்டிருந்தன.

இந்த வழக்கு கொழும்பு மேல் நீதிமன்றத்தின் மூவரடங்கிய Trial-at-Bar அமர்வில் விசாரிக்கப்பட்டது. நீதிபதிகள் நவரத்ன மாரசிங்க, இராமநாதன் கண்ணன் மற்றும் சுஜீவ நிஸ்ஸங்க ஆகியோர் அடங்கிய அமர்வே வழக்கை விசாரித்தது.

வழக்கு விசாரணை சுமார் ஐந்து ஆண்டுகள் நீடித்ததுடன், அரசுத் தரப்பில் 2,309 சாட்சிகள் தொடர்பான சாட்சியங்கள் பதிவு செய்யப்பட்டதாக முன்னதாக நீதிமன்றத் தகவல்கள் தெரிவிக்கப்பட்டிருந்தன.

மேலும், வழக்கின் மிகப்பெரிய தன்மையை கருத்திற்கொண்டு, குற்றப்பத்திரிகைகள் சிங்களம், தமிழ் மற்றும் ஆங்கிலம் ஆகிய மூன்று மொழிகளிலும் நீதிமன்றத்தில் விளக்கப்பட்டிருந்தன.

இன்று காலை ஆரம்பிக்கப்பட்ட தீர்ப்பு வாசிப்பு, மதிய உணவு இடைவேளைக்குப் பின்னரும் தொடர்ந்த நிலையில், தீர்ப்பின் தமிழ் மொழிபெயர்ப்பும் நீதிமன்றத்தில் வாசிக்கப்பட்டதாக தெரிவிக்கப்பட்டுள்ளது.

2019ஆம் ஆண்டு ஏப்ரல் 21ஆம் திகதி இடம்பெற்ற உயிர்த்த ஞாயிறு தாக்குதல்கள் தொடர்பான இந்த வழக்கின் தீர்ப்பு, நீண்டகாலமாக எதிர்பார்க்கப்பட்டிருந்த நிலையில் இன்று அறிவிக்கப்பட்டுள்ளது.