Flydubai சம்பவத்தில் புதிய தகவல்கள்

Previous Next

Font size:

துபாயில் இருந்து இஸ்ரேலின் டெல் அவிவ் நோக்கி கடந்த செப்டம்பர் 30ஆம் திகதி புறப்பட்ட Flydubai பயணிகள் விமானத்தில் இடம்பெற்ற அதிர்ச்சிகரமான சம்பவம் தொடர்பில் புதிய தகவல்கள் வெளியாகியுள்ளன.

Flydubai விமானம் FZ1073-இல் 170-க்கும் மேற்பட்டோர் பயணித்த நிலையில், விமானம் பறந்துகொண்டிருந்தபோது துணை விமானி, விமானத்தின் இந்திய கேப்டன் ஸ்மித் மச்சாரை தாக்கியதாக அதிகாரிகள் தெரிவித்துள்ளனர்.

இதன்போது விமானம் திடீரென ஆயிரக்கணக்கான அடி உயரத்தை இழந்ததாகவும், விமானத்தை கட்டுப்பாட்டுக்குள் கொண்டுவர பயணிகள் மற்றும் விமானக் குழுவினர் தலையிட்டதாகவும் விசாரணைத் தகவல்கள் தெரிவிக்கின்றன.

காயமடைந்த கேப்டன் ஸ்மித் மச்சார், விமானத்தின் காக்பிட் கதவைத் திறக்க முடிந்ததைத் தொடர்ந்து, பயணிகள் மற்றும் குழுவினர் தாக்குதல் நடத்திய துணை விமானியை கட்டுப்படுத்தியதாக தெரிவிக்கப்பட்டுள்ளது.

இதையடுத்து விமானம் சவுதி அரேபியாவின் தபுக் விமான நிலையத்தில் பாதுகாப்பாக அவசரமாக தரையிறக்கப்பட்டது.

இந்த சம்பவத்தில் துணை விமானியாக இருந்தவர் ஓமன் நாட்டைச் சேர்ந்த ஹமாம் அல்-ஹமாமி என அடையாளம் காணப்பட்டுள்ளார்.

அல்-ஹமாமி தொடர்பில் மேலும் அதிர்ச்சிகரமான தகவல்கள் வெளியாகியுள்ளன.

அவரது தீவிரவாத சிந்தனைகள் தொடர்பான கவலைகள் காரணமாக, ஓமானில் அவருக்கு விமானம் இயக்கத் தடை விதிக்கப்பட்டிருந்ததாக சர்வதேச ஊடகங்கள் செய்தி வெளியிட்டுள்ளன.

மேலும், கடந்த 2024ஆம் ஆண்டு ஓமானின் தேசிய விமான நிறுவனமான Oman Air-இல் அவருக்கு வழங்கப்பட்டிருந்த பயிற்சி பொறுப்பிலிருந்தும் அவர் நீக்கப்பட்டதாக தகவல்கள் வெளியாகியுள்ளன.

இதற்குப் பின்னர் அவர் Flydubai நிறுவனத்தில் பணியாற்றத் தொடங்கிய நிலையில், விமானப் பாதுகாப்பு தொடர்பான முந்தைய எச்சரிக்கைகள் இருந்தபோதிலும் அவர் எவ்வாறு விமானக் குழுவில் இணைக்கப்பட்டார் என்பது தற்போது முக்கிய விசாரணையாக மாறியுள்ளது.

அவரது பின்னணி மற்றும் பணிநியமன நடைமுறைகள் குறித்து ஐக்கிய அரபு அமீரகம் மற்றும் இஸ்ரேல் தரப்பிலான அதிகாரிகள் விசாரணைகளை முன்னெடுத்து வருகின்றனர். இஸ்ரேலின் Shin Bet உள்ளிட்ட பாதுகாப்பு அமைப்புகளும் இந்தச் சம்பவத்தை ஆராய்ந்து வருவதாக தகவல்கள் தெரிவிக்கின்றன.

அதேவேளை, சம்பவத்திற்கான முழுமையான நோக்கம் இதுவரை அதிகாரப்பூர்வமாக உறுதி செய்யப்படவில்லை. பயங்கரவாத தொடர்பு இருந்ததா, முன்கூட்டியே திட்டமிடப்பட்டதா அல்லது வேறு காரணமா என்பது குறித்து விசாரணை நடைபெற்று வருகிறது.

இந்த நிலையில், ஓமன் நாட்டைச் சேர்ந்த ஒருவரான அல்-ஹமாமி, டெல் அவிவ் செல்லும் விமானத்தின் துணை விமானியாக எவ்வாறு பணியாற்ற அனுமதிக்கப்பட்டார் என்பது தொடர்பிலும் அதிகாரிகள் கவனம் செலுத்தி வருகின்றனர்.

விமானப் பணியாளர்களின் பின்னணி மற்றும் பாதுகாப்பு பரிசோதனைகளை மேலும் கடுமையாக்குவது குறித்தும் இச்சம்பவத்துக்குப் பின்னர் விவாதங்கள் எழுந்துள்ளன.